Kiko e malesa di

sickle cell ta?

 

E malesa di sickle cell ta afektá bo sélula di sanger kòrá, e ta un malesa genétiko, bo por hered’é di bo mayornan. Pues bo ta nase kuné.

 

Malesa di sickle cell ta pone ku e sélulanan  ku normalmente ta rondó i flèksibel, ta bira steif i ta haña e forma di un mitar luna. Esaki ta stroba e sélulanan di move liber den e vena di sanger. Nan mester karga oksígeno pa hiba na tur órgano, pero awor nan ta keda pegá den e vena. Ora ku nan keda pegá asina i blòkia e vena, e ta okashoná hopi doló i e pashènt ta haña e asina yamá krísis di doló. E episodio di doló aki por dura un dia pero e por dura tambe un par di dia òf te asta un siman. Durante e krísis di doló e pashènt ta haña remedi kontra doló i den sierto kaso asta remedi hopi fuerte manera morfina.

clipart2963727 (1).png

Hende ku e malesa di sickle cell tambe por haña hopi komplikashon manera e.o. atake selebral, problema ku bista, daño na wesunan, ‘acute chest syndrome’ i despues di tempu por eksperensiá daño na órganonan manera e higra, nir, pulmon, kurason i bòfi. Algun di e komplikashonnan akí por tin asta konsekuensia fatal.
Tratamentu di e malesa di sickle cell mayoria biaha ta pa prevení i trata e komplikashonnan, pasobra no tin kura ainda pa e malesa mes. Pashèntnan mester bebe remedi tur dia manera ‘foliumzuur’ pa yuda e kurpa traha sélula di sanger kòrá.

 

Síntomanan di e malesa di sickle cell:

clipart967956.png

  • Anemia króniko, dor ku no tin sufisiente selulá di sanger kòrá òf HB den bo kurpa.

  • Un doló òf un krísis di doló ku no tin splikashon p’é. 

    Ora ku e vena di sanger ta blokiá, esaki ta okashoná doló i hinchamentu den e area.

  •  Bo ta kansa lihé, ta sinti kansansio konstantemente.

    Bo ta sinti débil òf suak dor di falta di energia pa motibu di e anemia.

  • Dehel, bo wowonan i bo kutis ta bira hel.

 
 

Kiko por kousa un krísis di doló?

  • Strès. 

  • Deshidratashon, debí na e kantidat abou di sanger den e kurpa.

  • Ehersisio eksesivo, debí na skarsedat di oksígeno.

  • Infekshon, malesa kousá pa bakteria òf vires.

  • Kambio diripente di temperatura, pasobra esaki ta pone e vena bira mas smal.

Bo tabata sa ku…..

  • Muchanan ku tin e malesa di sickle cell tin un rísiko haltu pa haña un òf mas atake selebral  entre dos pa diesseis aña.

  • Un tèst simpel di sanger por bisa si bo tin e malesa di sickle cell òf si bo ta un kargadó.

  • Sickle cell anemia por afektá tur rasa.

  • E malesa di sickle cell bo ta heredé di tur dos bo mayornan, i si bo ta kargadó di e malesa bo a heredé di un mayor.

  • E úniko posiblemente kura ku tin te ainda ta un ‘beenmergtransplantantie’, pero esei ta solamente posibel si tin un dunadó ku ta igualá.

    E tratamentu akí ta un riesgo grandi; e por kousa morto.

  • Selulá di sanger kòrá normal ta biba 120 dia, pero ora bo tin e malesa di sickle cell e sélula ta biba mas o ménos 16 dia.

  • Na Kòrsou tin mas o ménos 350 persona ku tin e malesa di sickle cell i tin mas ku dies mil persona ku ta kargadó.

  • Dia mundial di ‘Sickle Cell Awareness ‘ ta 19 di yüni.

  • Unesco a rekonosé e malesa di sickle cell komo un problema global(mundial) di salú públiko.

  • Muchanan ku malesa di sickle cell tin un retraso den nan desaroyo i/o kresementu.

Fuente di informashon: Sicklecellsociety.org