Ken ta Lisle?

Lisle Lianne Hooi tabata un mucha ku e malesa di sickle cell i ku a fayesé na edat di 19 aña dor di un komplikashon na su higra, kousá pa e malesa akí.

Lisle Lianne Hooi

Lisle tabata stima mucha i e kier a bira yùfrou  di skol.
Despues ku el a kaba skol di fundeshi el a bai Marnix VSBO kaminda el a sigui TKL. E la sigui despues ku HAVO na MIL unda el a yega te klas 4.
For di chikitu Lisle a lucha hopi ku e malesa di sickle cell. Na edat di 5 aña e la haña su promé krísis di doló. Lisle a dediká su tempu liber na baile, pasobra e tabata gusta balia pa Señor den iglesia. Lisle tabata un fiel kreyente i tabata stima Señor. Lisle tabata gusta yuda hende i e tabata hopi sosial.
Dor di Lisle su amabilidat i su amor pa hende el a impaktá tur hende rondó di dje.
E pastor di e iglesia tabata yam’é  Angel, pa motibu di su puresa. Na skol hopi mucha a yam’é un angel. Lisle tabata un bon ehèmpel pa su ruman- , su prima- i su amiganan.
Lisle su mama a lanta e fundashon na Lisle su nòmber, pasobra “ den su kurason e sa sigur ku Lisle lo ta hopi orguyoso i kontentu pa yuda  otro muchanan ku tin e malesa i tambe pa konsientisá Kòrsou di e malesa di sickle cell.” RIP Lisle Lianne Hooi.